Edhe pse shpesh nuk jemi vërtet të sigurt se deri në ç’masë ne si prindër jemi përgjegjës për rrugën që do të marrë fëmija ynë.
Ekspertët e Universitetit të Kembrixhit kryen një studim që tregoi se fëmijët e vegjël që kanë marrëdhënie të shëndosha me prindërit e tyre kanë më shumë gjasa të tregojnë disa sjellje të shkëlqyera kur arrijnë adoleshencën. Ky studim është një nga të parët që ka shqyrtuar se si marrëdhëniet prind-fëmijë ndikojnë në sjelljen sociale dhe shëndetin mendor gjatë rritjes të fëmijëve.
Ekspertët përdorën të dhëna nga më shumë se 10,000 njerëz të lindur midis viteve 2000 dhe 2002. Ata i ndoqën për më shumë se një dekadë, dhe zbuluan se fëmijët që kishin një marrëdhënie të ngrohtë me prindërit e tyre, nga mosha 3 deri në moshën 17 vjeçare, kishin më shumë gjasa të tregonin sjellje që synonin së pari mirëqenien e të tjerëve, si empatia, bujaria dhe gatishmëria për të ndihmuar të tjerët.
Në dallim me fëmijët që përjetuan marrëdhënie të tensionuara emocionalisht ose abuzuese me prindërit e tyre, kishin më pak gjasa të zhvillonin zakone të mira shoqërore.
Por kjo nuk ishte e gjitha. Gjithashtu, fëmijët e tillë treguan një tendencë më të shpeshtë për depresion dhe ankth gjatë fëmijërisë së hershme dhe adoleshencës. Bashkëautori i studimit, Ioannis Katsantonis, studiues në Universitetin e Kembrixhit, vuri re se prindërit luajnë një rol të madh: “Është me rëndësi të madhe se sa kohë mund të kalojnë prindërit me fëmijët e tyre dhe t’u përgjigjen nevojave dhe emocioneve të tyre.”
Studiuesit mblodhën për herë të parë të dhënat e sondazhit mbi prosocialitetin, pra veprimin pozitiv në shoqëri, dhe simptomat e brendshme të shëndetit mendor që tregojnë depresionin dhe ankthin, dhe shenjat e jashtme të problemeve të shëndetit mendor si agresioni. Më pas ata mblodhën informacion se si pjesëmarrësit i karakterizuan marrëdhëniet e tyre me prindërit sa i përket afërsisë, konflikteve emocionale dhe abuzimit, duke marrë parasysh të dy faktorët si etnia dhe statusi socio-ekonomik. Rezulton se shëndeti mendor dhe tiparet si empatia dhe gatishmëria për të ndihmuar janë të lidhura me atë se sa e fortë është një marrëdhënie që fëmijët kanë me prindërit e tyre në fëmijëri.
Bazuar në këtë studim, autorët e studimit theksuan se është shumë e rëndësishme të zhvillohet politika dhe mbështetja e synuar për prindërit e rinj që kanë vështirësi financiare ose probleme në punë, pasi këta faktorë mund të ndikojnë negativisht në atë se sa kohë cilësore mund të kalojnë me fëmijët e tyre. “Afërsia zhvillohet vetëm me kalimin e kohës dhe për prindërit që jetojnë ose punojnë në rrethana stresuese dhe të kufizuara, kjo shpesh nuk është e mjaftueshme,” tha Katsantonis./natalmedia.com/
*Materialet dhe informacionet në këtë portal nuk mund të kopjohen, të shtypen, ose të përdoren në çfarëdo forme tjetër për qëllime përfitimi pa miratimin e drejtuesve të “natalmedia”
