Në muajt e verës, shpesh mund të vërejmë se prindërit e mbrojnë fëmijën në karrocë nga dielli duke e mbuluar karrocën me pelenë ose me ndonjë pëlhurë tjetër. Ata e bëjnë këtë për të mbrojtur fëmijën nga dielli dhe nxehtësia direkte (ata mendojnë se krijojnë hije brenda karrocës). Megjithatë, kjo praktikë mund të jetë e rrezikshme si në verë ashtu edhe në dimër!
Rrezik i mbinxehjes së ajrit brenda karrocës
Ndërsa të rriturit mund ta rregullojnë mirë temperaturën e trupit të tyre, kjo aftësi është më pak e zhvilluar tek fëmijët – fëmijët e vegjël mund të mbinxehen, dehidratohen dhe madje të përjetojnë goditje të nxehtësisë për një kohë shumë të shkurtër.
Një studim suedez tregoi se edhe mbulimi me një pëlhurë të lehtë mund të çojë në mbinxehje të rrezikshme. Një test i ngjashëm u krye nga gazetarët australianë dhe mund ta shikoni në filmin më poshtë – pas një ore në gjysmëhije, koha e zakonshme për të ecur jashtë, karroca e mbuluar me pelenë u ngroh deri në mbi 45C.
How hot can a pram get in summer? | Today Show Australia – YouTube
Qarkullim i pamjaftueshëm i ajrit në karrocat e mbuluara
Përveç problemit më të madh – mbinxehja e ajrit nën mbulesë, pëlhura që mbulon karrocën nga skaji në skaj dhe mbyll çdo kalim ajri, shkakton më shumë probleme. Kur karroca ose sedilja e makinës është e mbuluar, parandalohet qarkullimi i vazhdueshëm i ajrit dhe fëmija thith të njëjtin ajër për një kohë të gjatë, gjë që mund të rrisë rrezikun e zhvillimit të infeksioneve të frymëmarrjes. Në verë, kjo mungesë e qarkullimit të ajrit mund të jetë mbytëse dhe të shkaktojë djersitje të tepërt.
Kur karroca është e mbuluar, nuk mund ta shihni fëmijën
Një fëmijë i vogël nuk mund t’ju tregojë se si ndihet. Këtë e tregon duke qarë dhe me gjuhën e trupit. Kur jeni në qytet ose në lëvizje, me një fëmijë në karrocë, mund të mos jeni në gjendje ta dëgjoni mjaft qartë zërin e fëmijës nga tingujt përreth. Gjithashtu, mbinxehja mund të shkaktojë alivanosje të fëmijës, dhe ai mund të mos ketë forcë të flasë dhe kështu të sinjalizojë se nuk ndihet mirë.
Kur karroca është e mbuluar, ju nuk mund ta shihni fëmijën dhe për këtë arsye do t’ju duhet më shumë kohë për të vërejtur se fëmija nuk është mirë ose se është koha për ta nxjerrë atë nga karroca.
Simptomat e dehidrimit tek fëmijët e vegjël
- Përgjumje (te foshnjat e vogla)
- Dobësi, veçanërisht nëse fëmija nuk ka forcë në krahët dhe këmbët e tij
- Nervozizëm
- Lëkurë të thatë
- Urinë e koncentruar, e errët
- Fontanelë e tërhequr (njollë e butë në kokë)
Simptomat e mbinxehjes dhe lodhjes nga nxehtësia tek fëmijët
- Përgjumje
- Nervozizëm
- Lëkurë e lagur
- Zbehje
- Tharje e gojës, syve dhe lëkurës
- Frymëmarrje e shpejtë
- Djersitje
- Dobësi (fëmija është i lodhur dhe pa energji)
- Etje e madhe
- Të vjella
Çfarë duhet të bëni nëse dyshoni se fëmija është mbinxehur
- Kalo në një zonë më të freskët, mundësisht me ajër të kondicionuar ose në hije të thellë, ku ka qarkullim të ajrit
- Jepini gji fëmijës ose ofroni ujë
- Ftojeni fëmijën duke ia fshirë fytyrën, qafën, krahët dhe këmbët me një leckë të lagur
- Kontrolloni nëse fëmija sillet normalisht – nëse reagon ndaj jush, nëse komunikon (në varësi të moshës) dhe nëse merr lëngje pa të vjella
- Nëse jeni të shqetësuar – kërkoni ndihmë mjekësore.
Çfarë të përdorni në vend të mbulesës së karrocave?
Kemi zbuluar se nuk është mirë të mbulojmë karrocën me batanije apo edhe pëlhura të holla, por çfarë duhet të bëjmë kur është vapë apo diell?
- Përdorni një karrocë fëmijësh që është e bërë nga një pëlhurë më e hollë, mundësisht me hapje anësore që mund të hapen për të lejuar qarkullimin e ajrit.
- Sigurohuni që fëmija të ketë qarkullim të ajrit të pastër. Nëse është e mundur, hapni rrjeta shtesë në karrocë, hiqni përforcimet në pjesën e pasme të karrocës, siç janë jastëkët shtesë. Kjo do të lejojë një rrjedhje më të mirë të ajrit.
- Kontrolloni rregullisht fëmijën dhe nxirreni rregullisht nga karroca, ose sedilja nëse nuk keni kondicioner në makinë, bëni një pushim herë pas here, në mënyrë që ta nxirrni fëmijën nga sedilja e makinës
- Përdorni një mbulesë dielli që mund të vendoset në karrocë, krijon hije, por që lejonë qarkullimin e ajrit.
- Shmangni daljen nga shtëpia ndërmjet orës 10:00 dhe 17:00. Nëse nuk është e mundur, përpiquni të ecni sa më shumë në hije dhe të jeni sa më pak jashtë.
- Vishni fëmijën me rroba të lehta, aplikoni krem kundër diellit.
- Në varësi të moshës, rrisni vaktet e ushqimeve dhe ofroni rregullisht dhe sa më shumë ujë. /natalmedia.com/
Materialet dhe informacionet në këtë portal nuk mund të kopjohen, të shtypen, ose të përdoren në çfarëdo forme tjetër për qëllime përfitimi pa miratimin e drejtuesve të “natalmedia”
